ఏసీ పేలి ఇల్లు దగ్ధం.. సీసీఐ తొలి ఛైర్మన్, రిటైర్డ్ ఐఏఎస్ అధికారి మృతి!

ఢిల్లీలోని హౌజ్ ఖాస్ ప్రాంతంలో ఉన్న ఒక నివాసంలో గురువారం అర్ధరాత్రి ఘోర ప్రమాదం జరిగింది. ఇంట్లోని ఎయిర్ కండిషనర్ (ఏసీ) ఇండోర్ యూనిట్ ఒక్కసారిగా పేలిపోవడంతో భారీగా మంటలు చెలరేగాయి. ఈ ప్రమాదంలో కాంపిటీషన్ కమిషన్ ఆఫ్ ఇండియా (సీసీఐ) తొలి ఛైర్మన్, ప్రముఖ రిటైర్డ్ ఐఏఎస్ అధికారి ధనేంద్ర కుమార్ (80) తీవ్ర పొగ పీల్చడం వల్ల ఆసుపత్రిలో చికిత్స పొందుతూ కన్నుమూశారు. ఆయన్ను రక్షించే క్రమంలో గాయపడిన కుమారుడు ప్రస్తుతం చికిత్స పొందుతున్నారు.

ప్రమాద సమయంలో ఇంట్లో ఐదుగురు ఉండగా స్థానికులు, పోలీసులు కలిసి వారిని బయటకు తీసుకొచ్చారు. తీవ్ర అస్వస్థతకు గురైన ధనేంద్ర కుమార్‌ను ఎయిమ్స్ ట్రామా సెంటర్‌కు తరలించినప్పటికీ ఫలితం లేకుండా పోయింది. ప్రాథమిక దర్యాప్తు ప్రకారం ఏసీ పేలుడు వల్లే మంటలు వ్యాపించాయని, ఇందులో ఎలాంటి అనుమానాస్పద కోణం లేదని పోలీసులు నిర్ధారించారు. సమాచారం అందుకున్న వెంటనే ఫైర్ సిబ్బంది అక్కడికి చేరుకుని మంటలను అదుపులోకి తెచ్చారు.

1968 బ్యాచ్ హర్యానా క్యాడర్ ఐఏఎస్ అధికారి అయిన ధనేంద్ర కుమార్, దేశ ఆర్థిక, పరిపాలనా రంగాల్లో కీలక సేవలు అందించారు. కేంద్ర రక్షణ, రోడ్డు రవాణా, సాంస్కృతిక శాఖల్లో కార్యదర్శిగా, ప్రపంచ బ్యాంకులో భారత ప్రతినిధిగా కీలక బాధ్యతలు నిర్వర్తించారు. ముఖ్యంగా 2009 నుంచి 2011 వరకు సీసీఐ వ్యవస్థాపక ఛైర్మన్‌గా పారదర్శకతకు బలమైన పునాది వేశారు. ఆయన మృతిపట్ల పలువురు ప్రముఖులు తీవ్ర సంతాపం వ్యక్తం చేశారు.